Föstudagur

Þó að þessi föstudagur sé að kveldi kominn, má ég til með að vekja athygli á sérstöðu hans og hans líkum. Sú bráðskemmtilega staða kemur upp ca. tvisvar á vori hverju, að það kemur föstudagur á eftir "sunnudegi". Í alvöru, hafiði ekki tekið eftir þessu? Uppstigningardagur og sumardagurinn fyrsti eru alveg eins og sunnudagar, bara ennþá meira hátíðis. Hvað svo? - vaknar maður svo upp á drungalegum mánudegi daginn eftir? Ekki aldeilis, - manni til ómældrar ánægju er föstudagur - og helgi fram undan. Og jafnvel þó að þeir hafi haft af manni einn frídag með því að skella á mann einum fyrir tvo í gær, - og jafnvel þó að ég hafi "þurft" að vinna á sumardaginn fyrsta, þá gleðst ég takmarkalaust í dag. Tek út þrefalda "föstudagur-eftir-sunnudag"-gleði (líka þó ég "þurfi" að vinna aukavinnu á morgunn laugardag). 

Í tilefni föstudagsins skellti ég inn nýlegri partýmynd (reyndar tekin á laugardagskvöldi). Ekki það að ég sé í brjáluðu partýi núna. Í kvöld gerði ég það helst til hátíðabrigða að horfa á Útsvar og þeyta rjóma út á ávaxtasalat. Er akkúrat að smjatta á því núna.

Lífið er yndislegt. 

Góða helgi. 

Athugasemdir

[Þórdís Einarsdóttir, 2.5.2008 kl. 23:38]

Mér finnst þetta vörusvik að setja tvo frídaga á einn. Ætli maður geti sent bréf til neytendasamtakanna?

Þ 

[Laufey B Waage, 2.5.2008 kl. 23:43]

Mér hefur stundum dottið í hug að verkalýðsdagurinn ætti kannski frekar að vera fyrsti virki dagurinn í maí, til að forðast svona "svik". Óhjákvæmilega lendir 1.maí af og til á laugardegi eða sunnudegi. Prófaðu endilega neytendasamtökin Þórdís.

[Laufey B Waage, 3.5.2008 kl. 00:27]

Sara mín, varstu í alvöru ekki meðvituð um það að 1.maí, sem er alþjóðlegur frídagur verkamanna, - bar upp á Uppstigningardag, sem er líka frídagur?

[Jóhanna Magnúsar- og Völudóttir , 3.5.2008 kl. 16:40]

Girnilegt ávaxtasalatið þitt!