Léttsveit

Vá hvað ég skemmti mér vel í gærkvöldi. Ég keyrði til Keflavíkur gagngert til þess "eins" að fara á nemendatónleika. Léttsveit Tónlistarskóla Keflavíkur (nú Reykjanesbæjar) var stofnuð fyrir 20 árum og voru þessir tónleikar því í veglegri kantinum: Yngri sveit, eldri sveit, og svo samtíningssveit fyrrverandi nemenda. Hver sveitin annari betri, - bæði hljómsveitirnar í heild sinni, - og svo voru ákveðnir hljóðfæraleikarar og söngvarar svo frábærir að maður vissi ekki hvort maður átti að falla í stafi, eða tryllast af kæti (jú auðvitað trylltist ég af kæti). Og kalla ég nú ekki allt ömmu mína í þeim efnum. Ég þykist hafa fjöldan allan af góðum viðmiðunum, því ég hef lengi verið eins og grár köttur á stórsveitartónleikum, jazztónleikum og fleirum í þeirri deildinni (rythmisku deildinni eins og vér tónlistarkennarar köllum það).

Og ekki skemmdi nú fyrir að ég fann fyrir töluverðu stolti - og fannst þetta vera dáldið svona "mitt". Tónlistarskóli Reykjanesbæjar hefur jú verið minn aðal vinnustaður síðustu 11 árin, auk þess sem ég hóf mitt tónlistarnám (lagði grunninn að mínu ævistarfi, svo ég gerist nú háfleyg) í Tónlistarskóla Keflavíkur (eins og þessi sami skóli hét þá).

Bítlabærinn hvað ha? Jú kannski er eitthvað til í því, en þeir sem hlut eiga að máli geta sko ekki síður montað sig af; The-fantastic-big-band-city.

P.s. ég rolaðist því miður ekki til að taka myndavélina með mér, en meðfylgjandi mynd tók ég af Stórsveit Reykjavíkur á Jómfrúnni í fyrrasumar.

Góða helgi gott fólk. 

Athugasemdir

[Elín Björk jónasdóttir (IP-tala skráð) 17.5.2008 kl. 19:48]

Æ hvað hefði verið gaman að vera þarna, ég spilaði með sveitinni í þrjú ár - en hafði ekki hugmynd um þessa tónleika!!

 Kveðja, 

Elín Björk.  

[Þórunn frænka þín (IP-tala skráð) 17.5.2008 kl. 23:05]

Þessi léttsveit er hreint frábær, hef heyrt í henni. Svo finnst mér Léttsveit Tónlistarskólans í Keflavík miklu smartara en Léttsveit Tóllistarskólans í Reykjanesbæ.  En hvað sem því líður eru þetta snillingar "þarna uppfrá"

Eigðu góða helgi.

[Mallý (IP-tala skráð) 17.5.2008 kl. 23:45]

Innlitskvitt og takk fyrir síðast kæra systir

[Jóhanna Magnúsar- og Völudóttir , 18.5.2008 kl. 06:51]

Þetta hefur örugglega verið frábært þarna í Keflavíkinni. Ég hef stundum sest á ,,Jómfrúartónleika" sérstaklega á góðviðrisdögum, man ekki hvort ég hlustaði á þessa sveit.