Allt mér að þakka, - og kenna.

Vildi bara vekja athygli ykkar á bongóblíðunni sem er brostin á. Glampandi sólskin og allt mér að þakka. Ástæðan? Jú, það rigndi eldi og brennisteini í morgunn þegar ég fór að heiman. - Svo auðvitað fór ég í gúmmístígvélum og regnúlpu. Og þá gerist þetta alltaf. Um leið og ég var komin niðrí bæ, brast á með sól og blíðu. Þvílíkt sem ég þurfti að berjast við skömmustutilfinninguna, þar sem ég leiddi hjólið niður Skólavörðustíg og Bankastræti í glampandi sólskini á skraufaþurri gangstéttinni. Bara að allt þetta fólk á sólkjólum og sandölum vissi að þetta er allt mér að þakka. Ég fórnaði mér fyrir fjöldann, einu sinni sem oftar.

En ég verð líka að viðurkenna það, að stundum í skraufaþurru, stenst ég ekki freistinguna að fara út á inniskónum. Sérstaklega á þessum árstíma, þegar maður er að reyna að láta eins og það sé ennþá sumar. Og þá er jafnan eins og við manninn mælt, - það byrjar að rigna. Ég biðst innilega afsökunar á öllum þeim skiptum.

Nú er ég að velta fyrir mér hvort ég á að þora í berjamó í blíðunni. Þá er eins víst að það byrji aftur að rigna. Tek sjensinn. - Og tek með mér stígvél og úlpu. 

Góða helgi. 

Athugasemdir

[Jóhanna Magnúsar- og Völudóttir , 13.9.2008 kl. 15:48]

Hey, ég sem hélt það væri ég sem stjórnaði veðri og vindum. Tek alltaf með mér regnhlíf á 17. júní til að það rigni ekki!

[Laufey B Waage, 13.9.2008 kl. 16:07]

Þetta er nú alveg hætt að vera fyndið. Ég var ekki komin út úr 101, þegar byrjaði að hellirigna. Fékk sms frá Söru, sem sagði að vedur.is lofaði lemjandi rigningu og 8 metrum á sek næstu 24 tímana a.m.k. Mjög skýr óbein skilaboð um að koma mér heim. Held ég leggist upp í sófa og horfi á Morse. Lofa að fara í úlpu og stígvél, ef ég skrepp út á eftir.

[Helga Björg, 13.9.2008 kl. 19:16]

hehe þú ert alveg frábær :) gott að þú stjórar sennilega ekki veðrinu hér hjá mér :) en svona af tillitsemi við aðra vinsamlegast vertu ´´i stígvelonum framvegis :)

[Jenný Anna Baldursdóttir, 13.9.2008 kl. 19:48]

..og það rigndi.

[Dóra Hlín (IP-tala skráð) 16.9.2008 kl. 08:37]

Hæ hæ

Takk fyrir síðast og takk fyrir mig - yndislegar móttökur alltaf á Vesturgötunni. Ertu til í að lauma til mín uppskriftinni af þessu dýrindismorgunverðarbrauði?

kveðja úr 400

[Laufey B Waage, 16.9.2008 kl. 09:19]

Takk stelpur. Bið afsökunar á þessu unaðslega haustregni. Lýsi ábyrgð á hendur mér.

Það gleður mitt gamla hjarta Dóra Hlín, að þú skulir kunna að meta móttökurnar hjá tengdamóðurinni.

Þú bara blandar saman í skál 5-7 dl af fínmöluðu spelti, 2 tsk vínsteinslyftidufti og 1,5 tsk af salti. Ég setti líka smá gusu af kúmeni, en þú getur líka sett smá kanil, eða rúsínur. Gerir holu í miðjuna og skellir það í einu eggi og pínu gusu af agave-sýrópi. Hrærir saman með sleif, um leið og þú bætir við slatta af sojamjólk (bara svo þetta verði mátulegt, ekki of blautt). Þá hellirðu tvo (mjóa) hringi af olífu-olíu útá og blandar saman. Þá ertu komin með flott samhangandi deig sem þú bara skellir útá smurða plötu. Ekkert að hnoða eða neitt vesen. Bakað í 40 mín við 160-170 (minna ef þú notar blástur). Verði ykkur að góðu elskurnar.  

[Þórdís Einarsdóttir, 16.9.2008 kl. 11:52]

Gætirðu ekki skellt þér í sjógallann og út að hjóla seinnipartinn, þá hlýtur að koma sól og blíða í staðin fyrir rigningu og rok sem þeir veðurfræðingar eru búnir að vara okkur við.

Ert það ekki annars þú sem ræður veðrinu?

Þ

[Ásthildur Cesil Þórðardóttir, 16.9.2008 kl. 12:31]

Hahahaha Laufey mín.

[Bjarki (IP-tala skráð) 17.9.2008 kl. 12:34]

Æi, mamma. Af hverju ertu að gefa Halldóru uppskrift af speltbrauði? Ill eru örlög mín.

[Þórdís Einarsdóttir, 17.9.2008 kl. 23:04]

HALLdóru who??

[Laufey B Waage, 18.9.2008 kl. 08:52]

Bara húmor hjá drengnum Þórdís: Hún Dóra mín heitir bara Dóra Hlín, ekkert Hall-neitt.

Bjarki minn, örlög þín eru óhemju góð: Þú ert svo heppinn, að þær konur sem elska þig mest, keppast um að elda og baka ofan í þig það hollasta og besta sem völ er á. Því ber að fagna og gleðjast.