Laufey B Waage

18.9.2008 | 09:29

Takk RÚV.

Ég er svo heppin að geta glaðst yfir litlu. Og geri það oft. Ég man t.d. einn föstudaginn fyrir nokkrum árum, þegar ég las það í mogganum mínum að þá um kvöldið ætti að sýna fyrsta Gettu betur þátt vetrarins og svo Taggart á eftir. Ég hreinlega trylltist úr kæti. Ég sem horfi að öllu jöfnu lítið á sjónvarp, átti að fá bæði uppáhöldin mín sama kvöldið. Nemendur mínir vissu ekki hvaðan á sig stóð veðrið, ég var dansandi og syngjandi af gleði allan daginn.

En ég var ein af þeim sem varð leið og beinlínis sorgmædd, þegar Vilhelm G Krinstinsson var látinn hætta með sitt unaðslega morgunútvarp. Í staðin kom einhver misheppnuð tilraun til að geðjast öllum á samtengdum rásum 1 og 2.

Þess vegna er ég alsæl þessa dagana. Vilhelm sjálfur er að vísu ekki mættur aftur, - en þulurinn á rás 1 spilar milda og ljúfa jazztónlist á milli klukkan 8 og 9, - Jan Johannson og fleiri vini mína - alveg í anda Vilhelms. Auðvitað á ég góða tónlist í þessum anda á diskum, - en það er bara allt annað að hafa þetta í útvarpinu. Ég veit ekki hvort félagslegt er rétta orðið. Það er bara svo notalegt að láta útvarpsþulinn velja fyrir sig úr öllum áttum - og vera með stutta og þægilega kynningu á milli, á meðan maður situr yfir morgunmatnum, morgunkaffinu og morgunblaðinu. Þá missir maður heldur ekki af fréttayfirlitinu í útvarpinu. Kannski ég prófi að kveikja fyrr á útvarpinu, til að vita hvort þessi unaður byrjar strax klukkan 7.

Svo er framundan þessi tími, sem mér finnst alltaf svo unaðslegur á vorin, - og ég er að temja mér að finnast jafn unaðslegur á haustin: - Þegar maður vaknar í myrkri, en svo birtir á meðan maður klæðir sig og borðar morgunmatinn.

Góðar morgunstundir eru gulls-ígildi.

Takk RÚV.

Flokkur: Bloggar | Facebook

Athugasemdir

Það þarf ekki mikið til að gleðja þig ... og ekki mig þá heldur. Það er hreinlega ávísun á tryllta gleði og hamingju að fá bæði Gettu betur og Taggart sama kvöldið, það er veisla.

Megi dagurinn þinn verða dásamlegur!