Símasamband.

Það fyrsta sem ég geri þegar ég kem úr sundi, er að kíkja á farsímann, til að athuga hverjir séu nú komnir á barm taugaáfalls yfir því að hafa ekki náð sambandi við mig á meðan ég lá í makindum í heita pottinum. Þegar engin "missed calls" eru á skjánum, stend ég ég við skápinn, nakin með blautt hárið - og tauta með sjálfsvorkunnartóni: Ég á enga vini .

"Ekki ég heldur" tauta þá dæturnar í sama tóni. Og smá stund látum við eins og "vinaleysið" hafi ekkert með það að gera, að þeir sem oftast hringja í okkur séu allir saman komnir í sundi (við sjálfar ásamt karlkyninu í næsta klefa).

Í fyrrakvöld bauð eiginmaðurinn mér í villibráðarhlaðborð í Perlunni, þriðja haustið í röð. Mikið ofboðslega sem hann er annars góður þessi maður minn. Hann veit sem er, að ég yrði ekki glaðari þótt hann biði mér í heimsreisu. Ég hreinlega elska vel eldaða villibráð í rómantísku umhverfi .

Nema hvað: Meðan eiginmaðurinn bregður sér afsíðis, dettur mér í hug að kíkja á símann, svona til að athuga hvað klukkan er. Hvað!! - ekkert samband. Þetta hlýtur að vera út af nálægðinni við flugvöllinn, -  hugsa ég. Farsímar trufla flugvélar í flugtaki og lendingu. Ég hef samt aldrei vitað til að það væri ekki samband við flugvöllinn. Þetta hlýtur að vera eitthvað nýtt . 

Ég var rétt að byrja þessar "greindarlegu" pælingar, þegar minn heittelskaði kom af salerninu - og rómantíkinn hélt áfram. Við fengum okkur eftirrétt.

Það var ótrúlega langt liðið á morgunn (í gær), þegar ég leit á símann og sá að það var enn ekkert samband. Nú, - þetta hafði þá ekkert með flugvöllinn að gera .

Láttu mig fá símann, - sagði eiginmaðurinn. Tók út batterí og símakort - blés á það og pússaði, eins og hvern annan spegil. Setti saman aftur, - og abrakadabra - mín komin í samband við umheiminn á ný. Eins gott að hann var heima í vetrarfríi. Annars hefði ég gert mig að fífli með því að hringja í Vondafón og kvarta undan bilun.

Góða helgi elskurnar.

Athugasemdir

[Jenný Anna Baldursdóttir, 31.10.2008 kl. 10:08]

Góð.

[Bjarki (IP-tala skráð) 31.10.2008 kl. 11:10]

Ef það þyrfti að slökkva á farsímasendum við flugvelli, þá fyrst væri komin einhver almennileg ástæða fyrir því að færa Reykjavíkurflugvöll út í buskann. En sem betur fer eru þessar áhyggjur hennar mömmu ekki í neinum tengslum við raunveruleikann.

Ég skal reyna að vera duglegri að hringja meðan þú ert í sundi.

[Berglind (IP-tala skráð) 2.11.2008 kl. 14:10]

Ég skal láta þig vita, Bjarki, næst þegar við mamma förum í sund

[Jóhanna Magnúsar- og Völudóttir , 2.11.2008 kl. 20:27]